पीएनबी घोटाळ्यातील मेहुल चोक्सीच्या प्रत्यार्पणासाठी हालचाली वाढल्या, महत्वाची अपडेट आली समोर

पीएनबी घोटाळ्यातील मेहुल चोक्सीच्या प्रत्यार्पणासाठी हालचाली वाढल्या, महत्वाची अपडेट आली समोर

Mehul Choksi Latest Update : पंजाब नॅशनल बँकेला (PNB)ला ९ हजार कोटींचा घोटाळा करून फरार झालेला हिरे व्यापारी मेहुल चोक्सी याला बेल्जिअममध्ये रविवारी अटक झाली आहे. यानंतर आता त्याच्या प्रत्यार्पणासाठी भारताकडून जोरदार हालचाली सुरु झाल्या आहेत. तहव्वूर राणाच्या प्रत्यार्पणानंतर भारतासाठी ही मोठी गोष्ट असणार आहे. त्यामुळं यासाठी आता भारत सरकारनं हालचाली सुरु केल्या असून ED-CBIचे अधिकारी बेल्जिअमला जाण्याच्या तयारीत आहेत.

भारतीय अधिकाऱ्यांनी 12 एप्रिल रोजी चोक्सीच्या प्रत्यार्पणासाठी (extradition) औपचारिक विनंती केली होती. त्यानंतरच बेल्जियममधील अँटवर्प पोलिसांनी चोक्सीला अटक केली. यासंदर्भात अँटवर्पमधील पब्लिक प्रॉसिक्यूटर्स ऑफिसच्या आदेशावरून ही अटक झाली, असं पोलीस प्रवक्त्याने स्पष्ट केलं.

मेहुल चोक्सीचा स्वित्झर्लंडला पळून जाण्याचा विचार अन् जाळ्यात अडकला; जाणून घ्या सविस्तर

इंडियन एक्सप्रेसच्या रिपोर्टनुसार, अंमलबजावणी संचालनालय (ED)आणि केंद्रीय अन्वेषण विभाग (CBI) यांनी प्रत्येकी दोन ते तीन अधिकाऱ्यांची टीम तयार करण्यास सुरुवात केली आहे. हे अधिकारी लवकरच बेल्जियमला जाऊन तेथील सरकारशी समन्वय साधतील आणि प्रत्यार्पणासाठी आवश्यक कागदपत्रांची पूर्तता करतील. चोक्सी ही प्रक्रिया न्यायालयात आव्हान देण्याची शक्यता असल्याने भारताकडून अधिक स्पष्ट आणि कायदेशीर तयारी सुरू आहे.

चोक्सीच्या अटकेनंतर त्याचे वकील विजय अग्रवाल यांनी प्रतिक्रिया देताना सांगितलं की, चोक्सीवर कर्करोगाचा उपचार सुरू आहे आणि वैद्यकीय आधारावर त्याच्या जामिनासाठी अर्ज केला जाईल. तसेच, तो फरार होण्याचा धोका नसल्याचाही दावा करण्यात येणार आहे. सध्या बेल्जियममधील अटक निर्णयाविरोधात अपील दाखल करण्याची प्रक्रिया सुरू असल्याचेही त्यांनी स्पष्ट केले.

CBI आणि ED च्या मुख्यालयांमध्ये चोक्सीच्या प्रत्यार्पणासाठी आवश्यक असलेल्या कायदेशीर रणनीतीबाबत उच्चस्तरीय बैठकांनाही सुरुवात झाली आहे. दोन्ही संस्था हा खटला देशात आणण्यासाठी पूर्ण ताकदीनिशी तयार आहेत.

follow us
  • fb
  • instagram
  • youtube

संबंधित बातम्या